Латушка: Лукашэнка загнаны ў кут: у яго два папярэджанні з боку Трампа

— Лукашэнка сёння загнаны ў кут, а фактычна так і ёсць дзякуючы стратэгіі Рыбакова і Пяткевіч, — кажа Павел Латушка ў інтэрв’ю Мікіту Мелказёраву на канале жизнь-малина. — Ён у раскарачцы знаходзіцца, бо яму два папярэджанні з боку прэзідэнта дзяржавы нумар адзін у свеце — самай уплывовай. І што, ён будзе маўчаць?

Зразумела, што яны працягваюць нейкую камунікацыю. Яны далі адказ публічны, што мы працуем над гэтым. Мы працавалі і працуем. Гэта што значыць, яшчэ 14? Не-не-не.

Трамп хоча атрымаць Нобелеўскую прэмію. Ён гэта кажа адкрыта. Ён сказаў: я скончыў шэсць войнаў, наступнага дня ён сказаў: сем.

Пагадзіцеся, калі ён упісвае ў сваю біяграфію, што дзякуючы яму былі вызваленыя ўсе палітзняволеныя ў дыктатуры ў Беларусі — 1300 плюс… Для нас перадусім гэта важна, для беларусаў, мы ўратавалі жыцці людзей. І дзякуй, калі гэта атрымаецца — гэта вельмі добра будзе. А для яго гэта перамога.

Ён сапраўды ў сваёй біяграфіі ці заяўцы патэнцыйнай можа напісаць: я вызваліў 1300 палітзняволеных, якіх катавалі, забівалі ў Беларусі, і плюс яшчэ нобелеўскага лаўрэата Алеся Бяляцкага.

На думку Латушкі, Мінск-3 — гэта рэальны сцэнар. Ён мяркуе, што «гэта стратэгія Лукашэнкі, якая падтрыманая Пуціным, якая можа выстраліць у нейкі момант, і яны да гэтага рыхтаваліся».

Палітык тлумачыць, чаму візіт Трампа выгадны Лукашэнку.

— Лукашэнка скарыстаецца з гэтай сітуацыі, каб падняць сваю суб’ектнасць, адмазаць свой брудны імідж, хоць часткова бруд неяк змазаць. Ён рукапажатным становіцца, яго прызнаюць хто прыязджае, так скажам, не дэ-юрэ, а дэ-факта.

…Ён таксама марыць, што гэта дапаможа яму пазбегнуць крымінальнай адказнасці за злачынствы, звязаныя з вывазам украінскіх дзяцей, за акт агрэсіі і за злачынствы супраць беларускага народу, злачынствы супраць чалавечнасці.

Калі Трамп атрымлівае такі мэсэдж з боку Пуціна, што я гатовы сустрэцца ў Мінску, што вы думаеце, ён не падтрымае? Трамп можа падтрымаць.

А калі яны да гэтага ўключаць Кітай, і калі Пуцін з Лукашэнкам на саміце ШОС пераканаюць Сі, і ён скажа: я прылячу ў Мінск... Лукашэнка проста атрымлівае ўсё, праўда?

Некаторыя кажуць: гэта нерэальна, Еўропа будзе супраць. А калі шчыра: хтосьці будзе пытацца Еўропу? На жаль, не. У гэтай сітуацыі будуць, магчыма, пытацца Украіну, але пачнуць ціснуць. Таму для нас гэта дрэнная гісторыя, бо гэта працуе на Лукашэнку.

…Калі гэта можа адбыцца, мы павінны з гэтага атрымаць максімум. І гэты максімум, пра што кажа Трамп: вызваліць усіх палітзняволеных. Думаю, што ён (Лукашэнка — С.) можа пачаць гульню часткова. Называлася у кансультацыях некаторы час таму назад 300 чалавек (якіх вызваліць правіцель — С.), а зараз сам Трамп наколькі я разумею, падняў стаўкі і слушна зрабіў.

Нам з маральнага пункту гледжання не падабаецца, як ён (Трамп — С.) называе Лукашэнку і, канешне, для нас гэта непрымальна: «шаноўны», «моцны лідэр» — гэта ўсе непрымальна.

Але для нас абсалютна прымальна і важна, што ён ставіць Лукашэнку ў кут. Ён раз сказаў пра 1300 (палітзняволеных — С.), другі раз сказаў пра 1300. Ён што, трэці раз павінен сказаць?

Трамп — палітык, якога цяжка прадказаць, але мяч на баку Лукашэнкі.

Калі Лукашэнка зараз адкіне мяч на бок Трампа, то наступны раз Трамп можа забіць у яго вароты, але як ён заб’е — мы не ведаем, не будзем прагназаваць, але гэта можа быць моцны ўдар.